Ferhad Bagirov

Azərbaycan Rabitə Nazirliyi stasionar rabitənin dəqiqəlik tarifini tətbiq edə bilər

gangster — Sat, 22 Jan 2011 12:31:47 GMT

Azərbaycanın Rabitə və İnformasiya Texnologiyaları Nazirliyi stasionar telefon rabitəsində yeni tariflərin tətbiqi imkanlarına baxır. Xüsusilə abunəçilər üçün dəqiqəlik tarif tətbiq oluna bilər və onlar aylıq abunə ödəmələrindən imtina edə bilərlər. Bu barədə şənbə günü jurnalistlərə rabitə və informasiya texnologiyaları naziri Əli Abbasov deyib.

Onun sözlərinə görə, abunəçi ay ərzində iki manat abunəçi məbləğində "danışırsa", dəqiqəlik tarifə keçə bilər.

"Bu cür tariflərin tətbiqi ilə bağlı Tariflər Şurası ilə işlər aparırıq. Bu qurum tariflərin artırılması məsələsinə çox kəskin yanaşır, çünki biz hələ müzakirə olunan bir neçə tətbiq variantları təklif etmişik. Ümumilikdə, bizim təklif etdiyimiz variantlar tariflərin aşağı salınmasını nəzərdə tutur",- nazir deyib.

Azərbaycanda sığorta sahəsində qanunvericilik bazasının təkmilləşdirilməsi ilə sığorta bazarının həcmi bir neçə dəfə artacaq

gangster — Sat, 22 Jan 2011 12:26:55 GMT

Azərbaycanın sığorta bazarının təkmilləşdirilməsi, əhalinin sağlamlığının müdafiəsi üçün "Sığortanın icbari növləri haqqında" qanunun qəbul edilməsi çox vacibdir. Bu barədə cümə günü Parlamentin İqtisadi siyasət komitəsinin sədri Ziyad Səmədzadə komitənin iclasında qanun layihəsinin müzakirəsi zamanı bildirib.

"Azərbaycanda adambaşına 16-17 manat təşkil edən sığorta mükafatlarının hazırkı səviyyəsi əhalinin pul gəlirlərinin səviyyəsinə uyğun gəlmir. Bu, inkişaf etməkdə olan digər ölkələrdəki, Avropa dövlətlərindəki sığorta bazarının inkişaf səviyyəsi ilə müqayisədə çox aşağı göstəricidir",- Səmədzadə bildirib.

Sığorta mükafatlarının dünya üzrə orta göstəricisi Azərbaycandakı mükafatların səviyyəsini 15 dəfə üstələyir.

Səmədzadənin sözlərinə görə, "Sığortanın icbari növləri haqqında" qanunun qəbul edilməsilə Azərbaycanda sığorta sahəsində qanunvericilik bazasını orta inkişaf səviyəsinə çatdırmaq olar. Parlament komitəsi sədrinin sözlərinə görə, icbari sığorta bazarının inkişafı üçün sığortanın təbliği üzrə bir sıra tədbirlərin keçirilməsi planlaşdırılır.

Maliyyə nazirinin müavini Azər Bayramovun sözlərinə görə, 2007-ci ildə "Sığorta fəaliyyəti haqqında" qanunun qəbul edilməsindən sonra yaranmış uyğunsuzluqla digər qanunvericilik aktları çərçivəsində də nizamlama mexanizmlərinin təkmilləşdirilməsi vacibdir.

"Sığorta mükafatlarının hazırkı səviyyəsi bizi də qane etmir. Hazırda ölkədəki sığorta bazarının həcmi ÜDM-in 0,4 faizini təşkil edir ki, bu da təkcə Avropanın inkişaf etməkdə olan ölkələrində deyil, həm də MDB-dəki göstəricilərdən aşağıdır. Lakin biz qanunvericilik bazasının təkmilləşdirilməsi, təbliğatın genişləndirilməsi ilə bu göstəricinin bir neçə dəfə artacağını gözləyirik", - Bayramov bildirib.

Nazir müavininin sözlərinə görə, sığortanın könüllü növlərindən fərqli olaraq, icbari növlər dövlət tərfindən nizamlanır. Ona görə də ilk növbədə məhz sığortanın bu növləri üzrə hüquqi bazanın inkişafına və təkmilləşdirilməsinə diqqət ayrılacaq. Sığortanın icbari növlərini tənzimləyən bundan əvvəlki qanun 1996-cı ildə qəbul olunub.

"2007-ci ildə "Sığorta fəaliyyəti haqqında" təkmilləşdirilmiş qanunun qəbul edilməsindən sonra bu sahədəki problemləri təhlil edərək, icbari sığortanın növləri üzrə hüquqi çərçivəni təkmilləşdirdik və qanunun yeni redaksiyada təqdim etdik", - Bayramov bildirib.

Bu qanun layihəsi icbari sığortanın dörd növünün - daşınmaz əmlakın, avtonəqliyyat vasitələri sahiblərinin məsuliyyətinin (OSAQO), sərnişinlərin sığortası, daşınmaz əmlakın istismarı zamanı mülki məsuliyyətin sığortalanmasını tənzimləyir.

Qanun layihəsinə görə, daşınmaz əmlakın icbari sığortası tikililərə, yaşayış evlərinə, fiziki şəxslərə məxsus mənzillərə, hüquqi şəxslərə məxsus ofislərə, dövlət əmlakına şamil ediləcək. Bununla yanaşı, sığorta hadisəsi zamanı bu əmlaka yanğın, partlayış, elektirk şəbəkəsində qısa qapanma, kanalizasiya və ya su xəttində baş vermiş qəza, təbiət kataklizmləri və s. nəticəsində dəyən ziyanla bağlı faktlar nəzərə alınacaq.

Daşınmaz əmlakın istismarı zamanı mülki məsuliyyətin sığortalanması bu əmlakdan istifadə zamanı üçüncü şəxsin ziyandan müfadiəsini nəzərdə tutur. Sığortanın bu növü sahibkarlıq fəaliyyəti ilə məşğul olan fiziki və hüquqi şəxslərə aid ediləcək. Sağlamlığa dəyən ziyan zamanı sığortanın bu növü üzrə ödənişin məbləği 50 min manat (bir nəfər üçün - 5 min manat), əmlak üçün - 50 min manat nəzərdə tutulub.

Sərnişinlərin icbari sığortası növündən asılı olmayaraq, nəqliyyatdan istifadə edən şəxslərə şamil olunur. Bu zaman sığorta ödənişinin məbləği hər bir adam üçün 5 min manat təşkil edir. İndiyədək sığortanın bu növü 2003-cü ildə qəbul edilən qanunla tənzimlənirdi, lakin bu gün qüvvədə olan forma əlverişli deyil və kompensasiya alınarkən problemlər yaradır.

Qanun layihəsi avtonəqliyyat vasitəsindən asılı olaraq, sığorta tarifinin müəyyənləşdirilməsi zamanı fərqli yanaşmanı nəzərdə tutur. Əmlak üzrə OSAQO zamanı ödənişin məbləği 5 min manat (bu gün bir min manatdır), sağlamlıq üçün - 50 min manat (bu gün beş min manat) təşkil edir. Fəaliyyətin bu növü 1996-cı ildə qəbul edilən qanunla tənzimlənir.

Müzakirələrin yekunu zamanı qanun layihəsinin Milli Məclisin plenar iclasına birinci oxunuşda baxılmaq üçün tövsiyə olunub.

Yanvarın 21-nə rəsmi məzənnə 0,7974 AZN/USD təşkil edir.

Bakıda "Kamaz" markalı avtomobil partlayış baş verib, 10 ton neft məhsulu ətrafa dağılıb

gangster — Sat, 22 Jan 2011 12:24:12 GMT

Azərbaycan, Bakı, 22 yanvar /Trend/

Yanvarın 21-də Bakı şəhəri, Qaradağ rayonunda avtomobil təmiri sexinin ərazisində "Kamaz" markalı avtomobilin qoşqusunda olan 30 tonluq çəndə qaynaq işləri aparılarkən yanğınla davam edən partlayış baş verib. Trend-in məlumatına görə, bu barədə şənbə günü Fövqəladə Hallar Nazirliyinin rəsmi İnternet saytı xəbər yayıb.

Hadisə nəticəsində, həmin çəndə olan təxminən 10 ton neft məhsulu ətrafa dağılaraq alışıb, avtomobilin kabina hissəsi yanıb, 1 nəfər xəsarət alıb. Yaralı xəstəxanaya aparılıb.

Hadisə yerinə cəlb olunmuş yanğınsöndürənlər yaxınlıqdakı avtomobilləri yanğından mühafizə edib, xilasedicilər ərazidə müvafiq təhlükəsizlik tədbirləri görüblər. Yanğın saat 18:35-də yanğınsöndürənlər tərəfindən söndürülüb. İlkin ehtimala görə, hadisəyə qaynaq işləri apararkən yanğın təhlükəsizliyi qaydalarının pozulması səbəb olub.

Azərbaycan və Türkiyə arasında mineral ehtiyatların axtarışı və tədqiqi sahəsində əməkdaşlıq haqqında memorandum imzalanıb

gangster — Sat, 22 Jan 2011 12:19:26 GMT

Şənbə günü Bakıda Azərbaycan və Türkiyə arasında mineral ehtiyatların axtarışı və tədqiqi sahəsində əməkdaşlıq haqqında niyyət memorandumu imzalanıb. Sənəd ticari-iqtisadi əməkdaşlıq üzrə hökumətlərarası komissiyanın altıncı iclası zamanı imzalanıb.

İclasın yekunları üzrə Azərbaycan Baş nazirin müavini Abid Şərifovla Türkiyənin energetika naziri Taner Yıldız tərəfindən yekun protokol da imzalanıb.

Baş nazirin müavini Abid Şərifovun iclasın yekununda dediyi kimi, imzalanmış protokolda təhsil, tələbə mübadiləsi, xüsusilə də səhiyyə sahəsində əməkdaşlığa böyük diqqət ayrılıb.

Türkiyəli nazirin sözlərinə görə,komissiyanın birgə işi qarşılıqlı əməkdaşlığın bir çox sahələrində ikitərəfli əlaqələrin möhkəmləndirilməsində mühüm rol oynayır.

"Bu iclasın keçirilməsi bir növ Türkiyə-Azərbaycan Strateji Şurasının keçirilməsinə hazırlıqdır", - Yıldız bildirib.

"Son illər iki ölkə arsında iqtisadi münasibətlər uğurla inkişaf edir. Buna misal kimi 10 il əvvəl mal dövriyyəsinin 250-300 milyon dollar olduğu halda, indi onun 2,5-3 milyard dollaradək artdığını göstərmək olar", -Yıldız bildirib.

Onun sözlərinə görə, iki dövlətin məqsədi mal dövriyyəsini 5 milyard dollaradək artırmaqdır. Nazirin dediyinə görə, bunun üçün bütün imkanlar var.

Yıldız qeyd edib ki, Türkiyə azərbaycanlı sərmayədarların turizm, nəqliyyat, xüsusilə də neft-qaz sahəsindəki fəaliyyətlərini diqqətlə izləyir

Fevralda türkdilli dövlətlərin media birliklərinin nizamnaməsi qəbul olunacaq

gangster — Sat, 22 Jan 2011 12:16:55 GMT

Fevralda türkdilli dövlətlərin media birliklərinin nizamnaməsi qəbul olunacaq. Bu barədə Trend-ə cümə günü Türkiyənin Baş naziri yanında Mətbuat İdarəsinin informasiya şöbəsinin müdiri Arif Gülən bildirib.

"Dekabrın 21-22-də Ankarada keçirilən türkdilli dövlətlərin media forumu zamanı bu ölkələrin jurnalist birliklərinin təsis edilməsi üzrə işçi qrupu yaradılıb. Fevralda Türkiyədə həmin işçi qrupunun iclası keçiriləcək və orada yeni strukturun nizamnaməsi qəbul ediləcək", - Gülən deyib.

Onun sözlərinə görə, indiyədək Özbəkistandan başqa, bütün türkdilli ölkələrin razılığı alınıb.

Gülən bildirib ki, türkdilli dövlətlərin media birliklərinin yaradılacağı dəqiq tarix hələ müəyyən edilməyib.

Bir müddət əvvəl Mətbuat Şurasının rəhbəri Əflatun Amaşov deyib ki, Ankaradakı media forumu zamanı türkdilli dövlətlərin media birliklərinin yaradılması və "Media qloballaşma dünyasında: imkanlar və problemlər" mövzusunda forumun təşkili haqqında qərar qəbul olunub.

Kipr dövlətlərin ərazi bütövlüyünə riayət olunmasının tərəfdarıdır – rəsmi hökumət nümayəndəsi

gangster — Sat, 22 Jan 2011 12:15:22 GMT

Kipr dövlətlərin ərazi bütövlüyünə riayət olunmasının tərəfdarıdır və Dağlıq Qarabağ münaqişəsinin danışıqlar yolu ilə həllini dəstəkləyir. Bu barədə şənbə günü jurnalistlərlə görüşdə Kipr Respublikasının rəsmi hökumət nümayəndəsi Stefanos Stefanu deyib.

"Biz münaqişənin təfərrüatlarına varmayacağıq, lakin onun sülh yolu ilə nizamlanmasını dəstəkləyirik", - Stefanu deyib.

Onun sözlərinə görə, Kipr rəhbərliyi problemin ATƏT-in Minsk qrupunun səyləri, həmçinin BMT-nin beynəlxalq hüquq və qətnamələrinə riayət şərtləri altında sülh yolu ilə həllini dəstəkləyir.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Bakıda Rusiya Məlumat-Mədəniyyət Mərkəzi açılıb

gangster — Sat, 22 Jan 2011 12:13:01 GMT

Bakıdakı Rusiya Məlumat-Mədəniyyət Mərkəzi hər iki ölkə üçün vacib olan humanitar dialoqa yardım edəcək. Bu barədə RF Prezidenti Administrasiyasının rəhbəri Sergey Narışkin mərkəzin açılışında bildirib.

"Açılışda iştirak etdiyimə şadam. İl bu mühüm və gözəl aksiya ilə başlayır", - Narışkin deyib. Onun sözlərinə görə, bu mərkəz zəngin tarixi fondlarla təchiz olunub.

"Mərkəzin yaradılması imkanına görə Azərbaycan hakimiyyətinə minnətdarlığımı bildirirəm", - o, əlavə edib.

Bakıdakı Rusiya Məlumat-Mədəniyyət Mərkəzi indi də çox dinamik inkişaf edən iki ölkənin əlaqələrinin möhkəmlənməsinə xidmət edir. Bu barədə Azərbaycan Prezidenti Administrasiyasının rəhbəri Ramiz Mehdiyev mərkəzin açılışında qeyd edib.

Mehdiyevin sözlərinə görə, bu, yeni səviyyəyə çıxan humanitar əlaqələr sahəsində mühüm hadisədir.

"Biz layihənin reallaşdırılmasında iştirak edən hər bir kəsə minnətdarlığımızı bildiririk. Əgər iki ölkənin rəhbərləri belə tədbirlər üçün vaxt tapırlarsa, bu, çox şeydən xəbər verir", - o, deyib.

"Mədəniyyətlərimizin bir-birinə təsiri mübahisəsizdir. Bu gün rus dili Azərbaycanda böyük önəm kəsb etməkdə davam edir", - Mehdiyev bildirib.

Onun sözlərinə görə, payızda iki ölkə prezidentlərinin himayəsi altında və hazırlanmasına bu mərkəzin də töhfə verəcəyi Rusiya-Azərbaycan humanitar forumu keçiriləcək.

Azərbaycanın Rusiyadakı səfiri Polad Bülbüloğlunun sözlərinə görə, Moskvada Bakıda açılan mərkəzə oxşar Azərbaycan-Rusiya Mərkəzinin yaradılması üzərində iş aparılır.

"Hazırda Moskvada belə mərkəzin yaradılması üzərində iş gedir. Doğrudur, bəzi çətinliklər var, lakin hesab edirəm ki, onlar tezliklə həll olunacaq", - səfir mərkəzin açılışında bildirib.

O, Bakıda mərkəzin açılmasını alqışlayıb. Bülbüloğlunun sözlərinə görə, belə mərkəzlərin açılması dövlətlərarası əlaqələrin möhkəmlənməsi və dərinləşməsi üçün son dərəcə vacibdir. Onu fikrincə, bu hadisə xüsusilə humanitar sahədə Azərbaycan-Rusiya münasibətlərini dinamikasını daha da gücləndirəcək.

RF Prezidenti Administrasiyasının rəhbəri Bakıda Rusiya Məlumat-Mədəniyyət Mərkəzinin yeni binasının açılışında iştirak edib.

Narışkini Rusiya Federasiyası Prezidentinin köməkçisi Cahan Pallıyeva, RF Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy, Rusiya Prezidentinin MDB iştirakçısı olan ölkələrlə əlaqələr və Rusiyalı Həmvətənlərin İşləri üzrə Əməkdaşlıq Təşkilatının rəhbəri Fərid Muhametşin və Rusiyanın digər məşhur dövlət və ictimai xadimlərinin daxil olduqları nümayəndə heyəti müşayiət edir.

Mədəniyyət Mərkəzinin fəaliyyəti Azərbaycan ictimaiyyətini Rusiyanın müxtəlif sahələrdə əldə etgdiyi uğurlar, onun mənəvi irsi, zəngin elmi və mədəni potensialı ilə tanış etməyə, ikitərəfli mədəni, təhsil, elmi-texniki proqram, işgüzar əlaqələr, rus dilinin tədrisinə dəstək, qeyri-hökumət təşkilatları və dostluq cəmiyyətləri ilə qarşılıqlı fəaliyyətə yönəlib.

Bakı şəhərindəki RMMM Rusiyanın xaricdəki ən müasir, məlumatla zəngin mədəniyyət mərkəzlərindən biridir. Şəhərin mərkəzində yerləşən yeni beşmərtəbəli bina zəruri müasir avadanlıqlar, texnika və aparatlarla təchiz olunub, bunada kino-konsert, konsert-sərgi zalları, eləcə də konfrans zalları və kitabxana var. RMMM-də rus dilinin tədris-metodiki mərkəzi, linqafon kabinetləri, məsafəli təhsil mərkəzi, innovasiya əməkdaşlığı mərkəzi işə başlayacaq, maraqlar üzrə klublar və studiyalar açılacaq.

Rusiyalı Həmvətənlərin İşləri üzrə Əməkdaşlıq Təşkilatının Rusiya mədəniyyət mərkəzlərinin yaradılmsı zamanı əsas iş prinsiplərindən biri ölkənin mədəni və mənəvi zənginliyini əks etdirməkdir. Belə yanaşmanın təzahürü ən yeni Dövlət Rus Muzeyi çoxmnediyalı layihəsinin- "Rus muzeyi-virtual filial" Məlumat-Təhsil mərkəzi, eləcə də Boris Yeltsin adına Prezident kitabxanasının elektron oxu zalı və digər layihələrin təqdimatı olacaq.

Açılış mərasimi çərçivəsində Rusiya Kitab Naşirləri Assosiasiyasının (RKNA) kitab sərgisinin təqdimatı da keçiriləcək. Nümayiş olunmaq üçün Bakıdakı RMMM-nin kitabxanasına hədiyyə ediləcək təxminən iki yüz adda yeni kitab hazırlanıb.

RMMM işinə Rusiyalı Həmvətənlərin İşləri üzrə Əməkdaşlıq Təşkilatının nümayəndəsi Ənvər Şeyxov başçılıq edəcək.

Azərbaycanda bəzən yol patrul xidməti əməkdaşlarının vətəndaşları əsassız incitməsi faktlarının qarşısı alınmalıdır - nazir Ramil Usubov

gangster — Sat, 22 Jan 2011 12:09:58 GMT

Azərbaycanın daxili işlər naziri Ramil Usubov bəzən yol patrul xidmətinin əməkdaşları tərəfindən vətəndaşların əsassız olaraq incidilməsi ilə bağlı faktlara rast gəlindiyini bildirib.

"Yol patrul xidmətinin əməkdaşları tərəfindən bəzən vətəndaşların əsassız olaraq incidilməsi ilə bağlı faktlara rast gəlinir. Bunun qarşısı mütləq alınmalıdır. Bu hallara son qoyulmalıdır", - Trend-in məlumatına görə, Usubov şənbə günü 2010-cu ilin yekunlarına dair keçirilən kollegiya iclasında bildirib.

DİN-in Dövlət Yol Polisi İdarəsinin rəhbəri Ramiz Zeynalovun çıxışına münasibət bildirən nazir əlavə edib ki, sürücülər bəzən yol patrul xidmətinin əməkdaşlarının gözü qarşısında yol hərəkət qaydalarını kobud şəkildə pozurlar.

"Amma yol polisləri bu filankəsin qohumudur əsası ilə qanun pozuntularına göz yumurlar. Bu hallara ciddi fikir verilməlidir. Qanun pozuntusu varsa, cəzalandırılmalıdır, pozuntu yoxdursa, vətəndaşlar incidilmələidir", - Usubov əlavə edib.

Ramiz Zeynalov çıxışında qeyd edib ki, il ərzində 965 mindən çox halda yol hərəkəti qaydaları pozulub.

Usubov bildirib ki, il ərzində yol hərəkəti qaydalarının 965 min dəfə pozulması narahatlıq doğurur.

"Bu, bizim aşkar etdiyimiz faktlardır. Bizim aşkar etmədiyimiz faktlar da var. Bu, vətəndaşların qanuna hörmətsizliyindən irəli gəlir", - nazir deyib.

Usubov Ramiz Zeynalova vətəndaşlarla bu sahədə maarifləndirmə işi aparılmasını və qanun pozuntularının sayının azaldılması ilə bağlı tapşırıqlar verib.

Zeynalov çıxışında bildirib ki, ötən il Nəsimi rayon yol polisi əməkdaşları 58 440 qayda pozuntusu, 1 074 sərxoş sürücü aşkar etdiyi halda, Bakının Yasamal, Nərimanov, Səbail, Xətai, Nizami rayonlarında yol polisi əməkdaşları 12 000 belə qayda pozuntusu, 200-dən artıq sərxoş sürücü aşkar edib.

Zeynalov onların fəaliyyətini tənqid edib və bildirib ki, ötən il bəzi istiqamətlərdə nöqsanların olması yol polisindən şikayət xarakterli müraciətlərin sayının artmasına səbəb olub, bu da narahatlıq doğurur.

Onun sözlərinə görə, bəzi yol polisləri qayda pozan sürücüləri yerində cərimələmək əvəzinə protokollar yazırlar. Bu isə vətəndaşların hüquqlarının pozulması ilə yanaşı, haqlı şikayətlərə səbəb olur.

"Bakının Yasamal, Sabunçu, Respublikanın Zərdab, Abşeron, Kürdəmir, Astara, Masallı, Ağsu və digər rayonlarda yol polislərinin ötən illər ərzində vətəndaşlardan yerində cərimə alma halları az olub", - Zeynalov deyib.

Avtomobillərə texniki baxış zamanı yol verilən nöqsanlardan danışan Zeynalov deyib ki, ötən il yol qəzalarının 51,6 faizi texniki parametrlərə cavab verməyən VAZ markalı avtomobillər tərəfindən törədilib və nəticədə 344 nəfər həlak olub.

Zeynalov bildirib ki, Oğuz, Ağsu, Siyəzən, Biləsuvar, Masallı, Şamaxı, Neftçala, Saatlı, Zərdab, Kürdəmir və digər rayonların yol polis şöbələri sərxoşluğa qarşı zəif mübarizə aparıblar.

İdarə rəisinin sözlərinə görə, hadisələrin 42,3 faizinin avtomobillərin yüksək sürətlə idarə olunması səbəbindən baş verdiyi halda, belə qayda pozuntularının aşkarlanması 15,6 faiz azalıb.

O, qeyd edib ki, Bakının Nizami və Xəzər rayonları istisna olmaqla, digər rayon polis şöbələrində, İsmayıllı, Qusar, Masallı, İmişli, Kürdəmir, Astara və digər rayon şöbələrində bu qayda pozuntularının aşkarlanmasına lazımi fikir verilməyib.

Zeynalov bildirib ki, Beyləqan, Şəki, Oğuz, Balakən və Şəmkir rayon yol polis şöbələrində avtomobillərin texniki baxışa cəlb olunmaları göstəricisi ümumrespublika üzrə göstəricilərdən aşağı olub.

İdarə rəisi sürücülük vəsiqəsi olmadan avtomobillərin idarə olunması, ötmə qaydalarının pozulması, piyadalar tərəfindən yol hərəkət qaydalarının pozulması istiqamətində aparılan işləri qənaətbəxş hesab etməyib

Azərbaycanın FM tezliyində yeni radionun qalibi məlum olub

fxaker — Fri, 21 Jan 2011 16:32:46 GMT

Azərbaycanın FM tezliyində yeni radionun adı məlum olub. Trend-in məlumatına görə, Azərbaycan Milli Televiziya və Radio Şurasının (MTRŞ) bu gün keçirilən iclasında qalib "Radio Azad xəbər" olub.

MTRŞ sədri Nuşirəvan Məhərrəmli bildirib ki, bu kanalda ictimai, siyasi, mədəni, iqtisadi və sosial xəbərlər veriləcək, əyləncəli xəbərlər yayımlanmayacaq.

"Bu kriteriyaya görə həmin radio müsabiqənin qalibi seçilib", - Məhərrəmli deyib.

Yeni radiokanalın yaradılması üzrə elan edilən müsabiqə ilə bağlı üç müraciət daxil olub.

103.3-cü FM tezliyində yer almaq üçün "Radio Azad xəbər", "Radio Obyektiv" və "Alternativ radio" tərəfindən müraciət olunub.

Müraciət edənlərdən ilk ikisi hüquqi, üçüncüsü fiziki şəxsdir.

103.3-cü FM tezliyində yer alacaq radio kanalı üzrə müsabiqə üçün noyabrın 25-dən dekabrın 25-ə qədər sənəd qəbulu həyata keçirilib.

Azərbaycanda 13 radio fəaliyyət göstərir.

Azərbaycanın Biləsuvar rayonunda zəlzələ olub

gangster — Fri, 21 Jan 2011 13:01:31 GMT

Azərbaycanın Biləsuvar rayonunda zəlzələ olub.

Zəlzələ cümə günü yerli vaxtla saat 01:58-də Biləsuvar rayonunun ərazisində baş verib. Bu barədə AMEA-nın Respublika Seysmoloji Xidmət Mərkəzindən məlumat veriblər.

Gücü 3,1 bal təşkil edən zəlzələnin ocağı 40 kilometr dərinlikdə olub.

Zəlzələ hiss olunmayıb.